რამდენად რეალურია ბრალდება, რომელიც ცოტა ხნის წინ უკრაინის დაზვერვამ გაავრცელა იმასთან დაკავშირებით, რომ საქართველოს გავლით, რუსეთში სამხედრო ტვირთები გაედინება, პოლიტოლოგი სოსო ცინცაძე „ალიასთან“ ინტერვიუში ამბობს, რომ ეს საკმაოდ სერიოზული ბრალდებაა და ერთი კონკრეტული პასუხის გაცემა რთულია:
„არ ვიცი, დამაჯერებლად ვერაფერს ვიტყვი. არაფერს გამოვრიცხავ. ისიც ითქვა, რომ ეს განცხადება უკრაინამ პრევენციის მიზნით გააკეთა, რადგან უკრაინელებს აქვთ ინფორმაცია, რომ საქართველოს გავლით უნდა გაეტანათ სამხედრო ტვირთები და ხმაური ატეხა, რომ ეს არ მომხდარიყო. ძალიან დიდი რისკია. მე არ მგონია, ჩვენს ხელისუფლებაში ვინმე ისეთი თავგაცხელებული იყოს, ვინც ამაზე წავა. ღმერთმა ნუ ქნას, თუ გამოგვიჭირეს რუსეთისთვის იარაღის კონტრაბანდაში, ზარალი იქნება ასჯერ მეტი, ვიდრე სარგებელი. ამერიკელებთან, ბრიტანელებთან ასეთ თამაშში წინასწარ წაგებული ხარ, რადგან დღეს თუ არა, ხვალ აუცილებლად გამოგიჭერენ, თუ ეს სისულელე და ქვეყნის სამტრო საქმე გააკეთე, მაგათ დაზვერვას ვერაფერს გამოაპარებ. კოსმოსიდან მანქანის ნომერს იღებენ, ადამიანის სახეს აფიქსირებენ და მერე იმ ადამიანის იდენტიფიკაციას ახდენენ სპეცპროგრამებით. რამდენი ტერორისტი ჰყავთ დაჭერილი თუ განადგურებული ამერიკელებს ამ გზით? უამრავი და მარტო კონკრეტული ტერორისტები არა, ტერორისტთა ბაზები აქვთ განადგურებული. ბრიტანეთსაც ძლიერი დაზვერვა ჰყავს, ამერიკას თუ რაიმე თანამედროვე სადაზვერვო ტექნოლოგია აქვს, ბრიტანეთს ყველაფერი გადასცა“ – აცხადებს სოსო ცინცაძე.
წყარო: „ალია“
