„თუკი ვინმე ამაზე გააკეთებს განცხადებას და ჩვენ ფაქტებით შევაფასებთ, რატომ მიგაჩნიათ ეს ხისტ განცხადებად?“

475 წაკითხვა

უკაცრავად, თუკი ვინმე იმას გვსაყვედურობს, რომ საპარლამენტო უმრავლესობა მისცა საზოგადოებამ „ქართულ ოცნებას”, მაშინ ეს ხალხი საყვედურობს ქართველ ხალხს, მათ ქართველ ხალხთან საყვედურის უფლება არ აქვთ, – ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა დასავლელი პარტნიორების კრიტიკასთან დაკავშირებით განაცხადა.

მისი თქმით, როცა ფაქტების საწინააღმდეგოდ განცხადებები ისმის ვინმეს მხრიდან, ამაზე ადეკვატური შეფასების უფლება მათ აქვთ მაშინ, როცა საერთაშორისო დოკუმენტებში რეფორმები პოზიტიურად არის შეფასებული.

„თუკი ვინმე ამაზე გააკეთებს განცხადებას და ჩვენ ფაქტებით შევაფასებთ, რატომ მიგაჩნიათ ეს ხისტ განცხადებად? ეს არის სამწუხარო, როცა ფაქტი ერთია და სხვა შეფასება გვესმის. უკაცრავად, თუკი ვინმე იმას გვსაყვედურობს, რომ საპარლამენტო უმრავლესობა მისცა საზოგადოებამ “ქართულ ოცნებას”, მაშინ ეს ხალხი საყვედურობს ქართველ ხალხს, მათ ქართველ ხალხთან საყვედურის უფლება არ აქვთ,”- განაცხადა ოხანაშვილმა.

ოხანაშვილი ასევე გამოეხმაურა ევროპარლამენტარ მარინა კალიურანდის განცხადებას და აღნიშნა, რომ როცა ინდივიდუალურ განცხადებებზეა საუბარი, აუცილებელია ფაქტებზე ვისაუბროთ, ამ კონტექსტში ოხანაშვილი აღნიშნავს, რომ საერთაშორისო საზოგადოება საქართველოში გატარებულ რეფორმებს დადებითად აფასებს.

“ინდივიდუალურ განცხადებებს რაც შეეხება, ალბათ, საჭიროა, ვისაუბროთ ფაქტებზე. ერთია შეფასება და მეორეა კონკრეტული ნაბიჯები, რა არის გაკეთებული. 2022 წლის აპრილში ევროსაბჭოს საპარლამენტო ასამბლეამ მიიღო რეზოლუცია, სადაც ხაზგასმულია რეფორმების მნიშვნელობა, საუბარია საკონსტიტუციო რეფორმაზე, რეგლამენტის ახალ რედაქციაზე, რომელმაც საპარლამენტო ზედამხედველობა გააძლიერა, განვახორციელეთ უზენაესი სასამართლოს მოსამართლეთა არჩევის რეფორმირება და შემოვიტანეთ უპრეცედენტო მოდელი, რომელიც უზრუნველყოფს მაღალ გამჭვირვალობას, შევძელით და განვახორციელეთ ამბიციური საარჩევნო რეფორმა ოპოზიციის ჩართულობით. ეს ყველაფერი შეფასებულია საერთაშორისო დონეზე და ასახულია ასევე რეზოლუციაში. ესაა კონკრეტული რეფორმების აღიარება, რადიკალურმა ოპოზიციამ კი თავის დროზე არც საკონსტიტუციო ცვლილებებს დაუჭირა მხარი, არც რეგლამენტის ახალ რედაქციას და ამბიციურ საარჩევნო რეფორმას. ამიტომ აქ გვაქვს აღქმები, რომელსაც უპირისპირდება ფაქტები, მათ შორის, ევროსაბჭოს დონეზე მიღებული რეზოლუციები”, – განაცხადა ოხანაშვილმა.

ცნობისთვის, ევროპარლამენტარმა მარინა კალიურანდმა განაცხადა, რომ ევროპული პარლამენტის დერეფნებსა და დისკუსიებში აღმოსავლეთ პარტნიორობის ქვეყნებისთვის წევრობის ან თუნდაც კანდიდატის სტატუსის მინიჭების დიდ სურვილს ვერ ხედავს. ამის შესახებ ინფორმაციას “საზოგადოებრივი მაუწყებელი” ავრცელებს.

Next Post

„ნამდვილად სიმართლის დროა ევროკავშირისთვის და მისი საერთაშორისო აქტორობის სანდოობისა და ლეგიტიმაციისთვის“

ხუთ ივნ 2 , 2022
475 წაკითხვანამდვილად სიმართლის დროა ევროკავშირისთვის და მისი საერთაშორისო აქტორობის სანდოობისა და ლეგიტიმაციისთვის, – ამის შესახებ საქართველოს პარლამენტის თავმჯდომარე შალვა პაპუაშვილი „ტვიტერზე“ წერს, რითაც ის ევროპარლამენტის საგარეო ურთიერთობათა კომიტეტის თავმჯდომარეს დევიდ მაკალისტერს ეხმიანება, რომელმაც განაცხადა, რომ იმ დროს, როდესაც მთელი რეგიონის უსაფრთხოება სასწორზეა, საქართველოს, მოლდოვისა და უკრაინისთვის კანდიდატის სტატუსის მინიჭება მნიშვნელოვანი პოლიტიკური სიგნალია. „ამ სტრატეგიულ მომენტში ევროკავშირმა უნდა აჩვენოს თავისი გრძელვადიანი ინტერესი რეგიონის მიმართ […]