უკრაინის პრეზიდენტი, ვოლოდიმირ ზელენსკი აცხადებს, რომ ქალაქი სევეროდონეცკი დონბასში დაპირისპირების ეპიცენტრად რჩება.
„ეს არის ძალიან სასტიკი ბრძოლა, ძალიან რთული. ალბათ ერთ-ერთი ყველაზე რთული ამ ომის განმავლობაში. მადლობელი ვარ ყველასი, ვინც ამ მიმართულებას იცავს. მრავალი თვალსაზრისით, იქ წყდება ჩვენი დონბასის ბედი,” – აღნიშნა ზელენსკიმ.
ამასთან, პრეზიდენტმა ისაუბრა იმაზე, რომ რუსი ოკუპანტები გეგმავენ, ოკუპირებული რეგიონების მათ შორის საქართველოს რეგიონების, საფეხბურთო გუნდები ფსევდოჩემპიონატისთვის გააერთიანონ.
„ოკუპანტებმა გამოაცხადეს აბსოლუტურად გიჟური ამბავი, რომ ისინი ემზადებიან ოკუპირებული ტერიტორიიდან – დონეცკიდან, ლუგანსკიდან, ხერსონიდან, მელიტოპოლიდან, ყირიმიდან და საქართველოს ნაწილიდანაც კი, საფეხბურთო კლუბები ფსევდო ჩემპიონატისთვის გააერთიანონ,“ – აღნიშნა ზელენსკიმ.
მან ამ გადაწყვეტილებას უკრაინელი ხალხის “დაცინვა” უწოდა. პრეზიდენტის თქმით, ამ ტერიტორიებისთვის, ამ ქალაქებისთვის ნორმალური ცხოვრება მხოლოდ უკრაინის დაბრუნება, მისი დროშა და კანონი იქნება.
