არასწორია, როდესაც ამ საკითხზე ტაბუს დადებას ითხოვენ, ეს ანტიდემოკრატიულია. ჩემი აზრით, პოლიტიკურ პარტიებსა და არასამთავრობო ორგანიზაციებს გამჭვირვალობის ანგარიშვალდებულება უნდა ჰქონდეთ, – ამის შესახებ საქართველოს პარლამენტის თავმჯდომარე შალვა პაპუაშვილმა გაზეთ „კვირის პალიტრასთან“ ინტერვიუში, საზოგადოებრივი მოძრაობა „ხალხის ძალის“ მიერ ინიცირებულ კანონპროექტზე – „უცხოური გავლენის გამჭვირვალობის შესახებ“ საუბრისას განაცხადა.
როგორც პარლამენტის თავმჯდომარე ინტერვიუში აღნიშნავს, ამ საკითხს შესწავლა სჭირდება.
„არასწორია, როდესაც ამ საკითხზე ტაბუს დადებას ითხოვენ, ეს ანტიდემოკრატიულია. ჩემი აზრით, პოლიტიკურ პარტიებსა და არასამთავრობო ორგანიზაციებს გამჭვირვალობის ანგარიშვალდებულება უნდა ჰქონდეთ. მე ეს ადრეც არაერთხელ მითქვამს. მოქალაქეებს აქვთ უფლება იცოდნენ, ვინ არის ის ხალხი, რომელიც ისეთი გადაწყვეტილებების მიღებაში მონაწილეობდა, რომელიც მათ ცხოვრებაზე გავლენას ახდენდა. ტექნიკურ დეტალებს ვერ შევეხები, დეტალურად არა ვარ გარკვეული, მაგრამ საუბრებიდანაც ვიცით და ეს არ არის ახალი თემა. შესაძლებელია, იყოს სენსიტიური თემები. ნამდვილად ყოფილა შემთხვევა, როდესაც სენსიტიური საკითხები და სხვადასხვა რეგულაცია ცუდად ყოფილა გამოყენებული, ამიტომ ამ საკითხს შესწავლა სჭირდება,“ – აღნიშნა პაპუაშვილმა.