პუტინი ყოველთვის კლავს. პუტინმა ნავალნი მოკლა. ასე გამოეხმაურა უკრაინის პრეზიდენტი ვოლოდიმირ ზელენსკი გავრცელებულ ინფორმაციას, რომლის თანახმადაც, კრემლის ლიდერის ერთ-ერთი მთავარი ოპონენტი ალექსეი ნავალნი გარდაიცვალა.
„პუტინი ყოველთვის კლავს. ახლახან ცნობილი გახდა, რომ ალექსეი ნავალნი გარდაიცვალა რუსულ ციხეში, როგორც ჩანს, ის მოკლა პუტინმა. სანამ პრეზიდენტის პოსტს ინარჩუნებს, მას არ აინტერესებს ვინ მოკვდება. პუტინმა პასუხი უნდა აგოს ყველაფერზე, რაც ჩაიდინა“, – აღნიშნა ზელენსკიმ გერმანიის კანცლერ ოლაფ შოლცთან ერთობლივ პრესკონფერენციაზე.
ინფორმაციისთვის, რუსი ოპოზიციონერი პოლიტიკოსი ალექსეი ნავალნი იამალ-ნენთა ავტონომიურ ოლქში მდებარე მესამე კოლონიაში გარდაიცვალა.
„სეირნობის შემდეგ პატიმარმა ალექსეი ნავალნიმ თავი ცუდად იგრძნო და გონება დაკარგა, ადგილზე ექიმები მივიდნენ, მაგრამ ნავალნის გადარჩენა ვერ მოხერხდა“, – აცხადებენ რუსეთის სასჯელაღსრულების ფედერალურ სამსახურში.
