„ხელისუფლება არ ითხოვს ჩვენგან ქრისტეს უარყოფას, არამედ უფრთხილდება ქვეყნის მოსახლეობას. მათ შორის ჩვენც, რამეთუ ჩვენ ამ ქვეყნის მოქალაქეები ვართ, რომ იმ ვირუსულ დაავადებას, რომელმაც მსოფლიოში პანდემიის სახე მიიღო და ჩვენთან, საბედნიეროდ, ეს სახე ჯერ არ მიუღია, არ შეეწირონ მოქალაქეები, მითუმეტეს ასაკოვანი ადამიანები“, – ამის შესახებ მამა თეოდორე გიგნაძემ მრევლის მიმართ გაკეთებულ განცხადებაში, სააღდგომო ლიტურგიაზე დასწრების საკითხთან დაკავშირებით განაცხადა.
მისი თქმით, ეს არის მორჩილება, რომელსაც მართლმადიდებლებს წმინდა წერილი ასწავლის.
„ეს მორჩილება ზუსტად ის მორჩილებაა, რასაც გვავალდებულებს წმინდა წერილი, პავლე მოციქული და ზოგადად, ის სული, რომელიც ქრისტეს ეკლესიაშია“, – აღნიშნა მამა თეოდორემ.
როგორც მან განაცხადა, ეკლესია ითვალისწინებს ჯანდაცვის სამინისტროს რეკომენდაციებს, ხოლო სააღდგომო ლიტურგიაზე მრევლის დასწრების საკითხს მთავრობა და საპატრიარქო გადაწყვეტენ.
