სამ. ივნ 25th, 2019

MediaPress

საინფორმაციო ანალიტიკური სააგენტო

„ტომი და ჯერი“ – არ მესმის, ხელისუფლება სააკაშვილს ქართულ პოლიტიკაში რატომ ექაჩება”

იურისტი ლევან ალაფიშვილი “ახალ თაობასთან” ინტერვიუში მიხეილ სააკაშვილის შესაძლო ექსტრადიციაზე საუბრობს.

ბატონო ლევან, მიხეილ სააკაშვილი აცხადებს, რომ მისი დეპორტაცია გარდაუვლად მოხდება. რას იტყვით თქვენ? 

„მე არ შემიძლია დავადასტურო, რომ ქართველი და უკრაინელი მაღალჩინოსნების შეხვედრებზე მართლაც სააკაშვილის ექსტრადირების საკითხი იყო განხილული. თუმცა, რა თქმა უნდა, გასაკვირი ის იქნებოდა, რომ არ განხილულიყო. აქვე ალბათ უადგილო არ იქნება, რუსი პრანკერების ჩანაწერიც რომ გავიხსენო“.

თუმცა, ამ ჩანაწერის ავთენტურობა დადგენილი არ არის.

„დიახ, მაგრამ ეჭვგარეშეა, რომ ეს საუბარი მოხდა. ცხადია, რომ ეს საკითხი პრობლემაა, როგორც ქართული მხარისთვის, ისე უკრაინისთვის. ეს ყველაფერი ამას ადასტურებს. როგორც არ უნდა წარიმართოს ეს პროცესი, ვერც საქართველო და ვერც უკრაინა ვერ მისცემს თავს იმის უფლებას, რომ კანონსა და დემოკრატიულ სტანდარტებზე მაღლა დადგეს, ისე, როგორც ამას ჩვენი ჩრდილოელი მეზობელი აკეთებს.
სასამართლო პროცედურების გარეშე არათუ მიხეილ სააკაშვილის, ყოფილი პრეზიდენტის, არამედ სხვა ნებისმიერი პირის ექსტრადირება შეუძლებელია, ვერ მოხდება. ნებისმიერ პირს გარანტირებული აქვს მისი საქმის განხილვა მინიმუმ ორი ინსტანციის სასამართლოში.
ჯერ არც ერთ სასამართლოში ექსტრადირების საკითხი არ განიხილება. რამდენჯერმე იყო ეს საკითხი დაყენებული, მოთხოვნა იყო ექსტრადირებაზე, მაგრამ, ასევე, იყო მოთხოვნაზე პასუხად უარი მიღებული. ეს პროცედურა შეიძლება განახლდეს, მაგრამ ეს არ ნიშნავს საკითხის უმალ გადაწყვეტას. ეს პროცედურები ორივე მხარისთვის ძალიან მძიმე იქნება“.

იუსტიციის სამინისტროს ეს მოთხოვნა აქვს გაკეთებული და უარიც აქვს მიღებული, მაგრამ მაშინ უკრაინაში სხვა პოლიტიკური რეალობა იყო, დღეს სხვა რეალობაა.

„მე ამ შემთხვევაში მხოლოდ სამართლებრივ ნაწილზე ვმსჯელობ: ორი უარი იუსტიციის სამინისტროს აქვს მიღებული შემდეგი მიზეზით: ერთი, მიხეილ სააკაშვილი მაშინ უკრაინის მოქალაქე იყო, ექსტრადირებაც დაუშვებელი იყო და ამიტომ მიიღო უარი. მეორე მიზეზი: უკრაინულმა მხარემ ჩათვალა, რომ საკმარისი მტკიცებულებები არ იყო და იუსტიციის სამინისტროს უარით უპასუხა.
რაც შეეხება სამართლებრივ რეალობას, დღეს ეს რეალობა შეცვლილია. სააკაშვილი არც უკრაინის მოქალაქეა და არც – საქართველოსი. ასევე, საქმეზე განაჩენიც არის დამდგარი და პროცედურის დაწყების ფორმალური საფუძველი განსხავებულია. სხვა საკითხია, განახლდება თუ არა ეს პროცედურა, შემდეგ რა გადაწყვეტილებას მიიღებს უკრაინის მთავარი პროკურატურა და საქართველოს იუსტიციის სამინისტრო. ასევე, როგორც გითხარით ორი ინსტანციის სასამართლო, ამ პროცედურებზეა დამოკიდებული, იქნება თუ არა სააკაშვილის ექსტრადიცია საქართველოში“.

ექსპერტები ამბობენ, რომ ექსპრეზიდენტების ციხეში ჩასმა, სამართლებრივი დევნა მარტივი არ არის. რამდენად შეძლებს საქართველოს პროკურატურა უტყუარი მტკიცებულებების დადებას სააკაშვილის წინააღმდეგ? როდესაც საქმე ეხება ყოფილ პრეზიდენტს, ეს საქმე იქნება განხილვის საგანი არა მხოლოდ ქვეყნის შიგნით, არამედ მის ფარგლებს გარეთ.

„დიახ, რა თქმა უნდა, ეს ასე იქნება. ეს საქმე უკვე გასცდა ჩვენი ქვეყნის არეალს. არათუ მნიშვნელოვანი, არამედ შეიძლება გადამწყვეტიც იყოს. მიხეილ სააკაშვილი იყო სახელმწიფოს მეთაური, დასავლეთის პარტნიორი სახელმწიფოს მეთაური. ამდენად, ასე მარტივი არ იქნება თუნდაც დასავლეთისთვის იმ ფაქტის მიღება, რომ თურმე სააკაშვილი კრიმინალი იყო და მათ კრიმინალთან უწევდათ პარტნიორობა და მხარს კრიმინალს უჭერდნენ. ხვდებით, ეს რა დონის სკანდალი შეიძლება იყოს?! ამიტომ არის დამაჯერებელი, მყარი, უტყუარი მტკიცებულებების ერთობლიობის წარმოდგენა საჭირო მთავარი პროკურატურის მხრიდან.
თუკი უკრაინისა და საქართველოს ხელისუფლება ამ კონტექსტში გაიაზრებენ ამ ყველაფერს და რეალურად შეაფასებენ ამ გამოწვევას, მაშინ მათ მოუწევთ სერიოზული შრომის გაწევა“.

ექსპერტები არ გამორიცხავენ, რომ შეიძლება სააკაშვილს აწყობს ექსტრადიცია, რომ ამით მას შანსი მიეცემა საქართველოში თავისი პოლიტიკის განახლების. ეს ვერსია რეალობასთან ახლოს არის?

„დიახ, რასაკვირველია. რაც შეეხება პოლიტიკურ ნაწილს, მთელი ეს პროცესი მულტფილმ “ტომი და ჯერის” მაგონებს, ერთმანეთის გარეშე რომ ვერ ძლებენ. ამდენად, მე არ მესმის ჩვენი ხელისუფლების ძალისხმევის, რომ მიხეილ სააკაშვილი კვლავ დატოვონ იმ პოლიტიკურ სივრცეში, რომელზეც მან შეგნებულად თქვა უარი. სახელმწიფოს მეთაურმა, უცხო ქვეყნის სამსახურის გამო უარი თქვა თავისის სახელმწიფოს მოქალქეობაზე. ამით ის ავტომატურად გავიდა ამ ქვეყნის პოლიტიკური ცხოვრებიდან და არ მესმის, რატომ აბრუნებენ?! არ მესმის, ჩვენი ხელისუფლება რატომ ექაჩება ამ რეალობაში სააკაშვილს. შეიძლება იმიტომ, რომ ამით შეინარჩუნოს საკუთარი თავი ამ პოლიტიკურ რეალობაში“.

კომენტარები

ასევე წაიკითხეთ