პარტია „მომავალი საქართველო“-ს ლიდერი გიორგი ლაღიძე, არჩევნების შემდგომ სიტუაციას აფასებს და აცხადებს, რომ პროტესტის გაგრძელება მნიშვნელოვანია.
„აუცილებელი და მნიშვნელოვანია, პროტესტის გაგრძელება ვინაიდან, მიგვაჩნია, რომ არჩევნები ქვეყანაში გაყალბდა, მათ შორის ჩვენი პოლიტიკური პარტია ძალიან დაზარალდა. ჩვენ, სრულიად სოლიდარული ვართ იმ ოპოზიციური სპექტრის, ვინც ქუჩაში ვადამდელ არჩევნებს ითხოვს. ჩვენ ამ აქციებში არ ვმონაწილეობთ, თუმცა, ჩვენს პარტნიორ პოლიტიკურ ძალებთან ერთად, გავავრცელეთ შესაბამისი განცხადება, დავგმეთ ჩატარებული არჩევნები. ამასთან ერთად, ექვსი პოლიტიკური სუბიექტი ვგეგმავთ ცალკე საპროტესტო აქციების დაწყებას. ცალსახაა, რომ არსებულ სიტუაციას არავინ არ შეეგუება და უნდა მივაღწიოთ იმას, რომ ქვეყანაში დაინიშნოს ვადამდელი არჩევნები. ჩვენი ბრძოლა არის სამართლიანი, სიმართლე ჩვენს მხარესაა და ჩვენ დავიცავთ თითოეული ჩვენი ამომრჩევლის ხმას. ამასთან ერთად, გეტყვით, რომ ჩვენი ბრძოლა არ გასცდება კანონის ჩარჩოებს“ – აცხადებს გიორგი ლაღიძე.
