სამ. ივნ 25th, 2019

MediaPress

საინფორმაციო ანალიტიკური სააგენტო

ყაზახეთი: მემკვიდრეობითობა საპრეზიდენტო არჩევნების შემდეგ

1 min read

ყაზახეთის რესპუბლიკის რიგგარეშე საპრეზიდენტო არჩევნებზე თვალის დევნების პარალელურად, ჟურნალისტის სტატუსით, სხვა ჟურნალისტებთან ერთად, შევხვდი ყაზახეთის საგარეო საქმეთა მინისტრის მოადგილეს, რ. ვასილენკოს. შეხვედრა საინტერესო გამოდგა, ყაზახეთის დიპლომატი საკმაოდ კონკრეტულ პასუხებს სცემდა დასმულ შეკითხვებს. 

ვასილენკოს პრეს-კონფერენციის შედეგად, შემდეგი დასკვნების გაკეთება შეიძლება:
პირველი, რაც ალბათ ყველაზე საინტერესოა საქართველოს რეალობის გათვალისწინებით, ისაა, რომ ყაზახეთის საპრეზიდენტო არჩევნებზე გავლენის მოხდენის მცდელობები გარე ძალების მხრიდან არ იგრძნობა. მით უმეტეს არ არსებობს პირდაპირი ჩარევის მცდელობები.
2019 წლის 9 ივნისის არჩევნები ყველაზე უფრო კონკურენტიანია დამოუკიდებელი ყაზახეთის 28-წლიან ისტორიაში. მართალია, ფავორიტი აშკარაა და მისი სახელი ცნობილია – ყასიმ-ჟომარტ ტოკაევი, მაგრამ უკონკურენტო და უალტერნატივო არჩევნები ეს ნამდვილად არ ყოფილა. პრეტენდენტთა რაოდენობა 7-ია, ყოველ მათგანს აქვს კანონით მინიჭებული უფლება, ხალხისთვის, ამომრჩევლებისთვის, მიეწოდებინათ ინფორმაცია საკუთარი თავის შესახებ და ეწარმოებინათ საარჩევნო კამპანია. ნაზარბაევის გადაწყვეტილება, დაენიშნა რიგგარეშე არჩევნები, მოულოდნელი აღმოჩნდა თითქმის ყველასათვის, ამიტომ ენთუზიაზმი ამ არჩევნებზე მით უფრო დიდია.
ახალი პრეზიდენტი, რა თქმა უნდა, სიახლეებს შეიტანს ქვეყნის მართვის სისტემაში, მაგრამ მისი მმართველობა მაინც მთლიანად იქნება ორიენტირებული თავისი წინამორბედის, ერის ლიდერის, ნურსულთან ნაზარბაევის მიღწევებზე. აუცილებელია ჯერ ამ მიღწევების შენარჩუნება და შემდგომ მათი გაღრმავება. მემკვიდრეობითობა იქნება ახალი პრეზიდენტის ამოსავალი წერტილი. ეს განსაკუთრებით ყაზახეთის საგარეო პოლიტიკას ეხება, ცვლილებები ამ მიმართულებით მინიმალური და არაარსებითი ხასიათის იქნება. ყაზახეთი ერთგული დარჩება თავისი სტრატეგიის, რომელიც მიმართულია ოკეანეებზე გასასვლელი სტაბილური მარშრუტების უზრუნველყოფის, ახალი ბაზრების ათვისების და რეგიონში, ისევე, როგორც მის ფარგლებს გარეთ, მშვიდობისა და სტაბილობის გავრცელებაში. ყაზახეთი იმეგობრებს თავის ყველა მეზობელთან, პირველ რიგში, რუსეთთან და ჩინეთთან, ასევე გააღრმავებს ურთიერთობებს აშშ-სთან და ევროკავშირთან. მთავარი გამოწვევა ახალი პრეზიდენტისათვის იქნება ეკონომიკური ზრდის უზრუნველყოფა, ეკონომიკის დივერსიფიკაცია და მოსახლეობის ცხოვრების დონის ზრდა.
შეხვედრაზე ასევე გამოიყო ახალგაზრდობის პრობლემატიკა, ყაზახური სახელმწიფო ზრუნავს იმაზე, რომ უცხოეთის სასწავლებლებში სახელმწიფო სტიპენდიებით გასული ახალგაზრდობა ისევ საკუთარ სამშობლოს გამოადგეს. ამ მხრივ შედეგები ძალზე იმედისმომცემია, სტუდენტი ახალგაზრდობის აბსოლუტური უმრავლესობა თანხმდება, რომ იმუშაოს და კარიერა გააკეთოს ყაზახეთში.
საყურადღებოა ყაზახეთის დამოკიდებულება დიდი სამამულო ომისადმი. ბელარუსი ჟურნალისტის შეკითხვაზე, თუ როგორ ვითარდება ორმხრივი ურთიერთობები, მინისტრის მოადგილემ აღნიშნა, რომ  ბელარუსმა უზარმაზარი წვლილი შეიტანა ფაშიზმზე გამარჯვებაში და ვინაიდან მრავალი ყაზახი მედგრად იბრძოდა ამ ომში, ეს ჩვენს ურთიერთობებს უფრო ემოციურს ხდის და მეტ დადებით თვისებას სძენსო.
საინტერესოა რუსეთთან და ჩინეთთან ყაზახეთის ურთიერთობების ზოგიერთი სტატისტიკური მაჩვენებელი. რუსული კაპიტალის მონაწილეობით, ყაზახეთში 10 ათასზე მეტი კომპანია მოღვაწეობს. ყაზახეთში 4 მილიონი ეთნიკური რუსი ცხოვრობს, ხოლო რუსეთში 1 მილიონი ყაზახი. ორ სახელმწიფოს ერთმანეთთან აკავშირებს ევრაზიის ეკონომიკურ კავშირში მჭიდრო თანამშრომლობა, ასევე კოლექტიური უსაფრთხოების ორგანიზაცია. ჩინეთთან ყაზახეთს 55 ეკონომიკური პროექტი აქვს, 28 მილიარდი დოლარის საერთო მოცულობით. ყაზახეთის სასოფლო-სამეურნეო პროდუქცია ძალზე პოპულარულია ჩინეთში. ჩინეთის სინცძიან-უიგურეთის ავტონომიაში 1 მილიონ 600 ათასამდე ეთნიკური ყაზახი ცხოვრობს.
ყაზახეთი წარმატებით ახორციელებს პროექტს სახელწოდებით “ჟუსან” (ქართულად: აბზინდა), რომელიც მოიცავს სირიაში წასული ბოევიკების და მათი ოჯახის წევრების ფსიქოლოგიურ რეაბილიტაციას და სოციალურ ინტეგრაციას საზოგადოებაში. ეს ჰუმანური პროექტი კიდევ ერთხელ მეტყველებს ყაზახეთის მშვიდობიან მიზნებზე. საგარეო საქმეთა მინისტრის მოადგილე ვასილენკომ კიდევ ერთხელ გაუსვა ხაზი გარემოებას, რომ ყაზახეთის სახელმწიფო ამ მიდგომებსა და პრინციპებს ახალი პრეზიდენტის პირობებშიც არ შეცვლის.
გულბაათ რცხილაძე,
ყაზახეთი, ნურ-სულთანი
კომენტარები

ასევე წაიკითხეთ