„ფეისბუქში“, ერთ-ერთმა მომხმარებელმა გაავრცელა ინფორმაცია, რომ ცოტნე გამსახურდიას მიერ კოლხური კოშკის ეზოში ჩაყრილი ვაზი გაკაფეს და მერე ცეცხლი წაუკიდეს. ამ ვანდალური აქტის ავტორად, არც მეტი, არც – ნაკლები, ცოტნეს დედას მანანა არჩვაძე-გამსახურდიას ასახელებენ. ambebi.ge-ს ცოტნე გამსახურდიას მეზობელი უყვება:
„ცოტნემ კოლხური კოშკის ეზოში გასული წლის ნოემბერში ჩაყარა ვაზი, გორის მწვანე და კახური მწვანე. ისე ელოლიავებოდა, სულ თავს დასტრიალებდა პატარა ვენახს. მოგეხსენებათ, რომ მან ბოლო წლებში მეღვინეობას მიჰყო ხელი და დიდი სიყვარულით ეკიდებოდა ამ საქმეს, რაშიც მისი მეგობარი მეღვინეებიც ეხმარებოდნენ.
ცოტნე ვაზზე და ღვინოზე „ფეისბუქის“ პირად გვერდზეც ხშირად წერდა და ფოტოებსაც აქვეყნებდა.
რაც ცოტნე დაჭრეს და სამკურნალოდ ჯერ თურქეთში, შემდეგ კი გერმანიაში წაიყვანეს, მეგობრები მოდიოდნენ და ისინი უვლიდნენ ვაზს და ღვინოსაც. კოშკის გასაღები მხოლოდ გიორგის, მის ძმას ჰქონდა და ცოტნეს უნახავდა.
რაც ამ ქალბატონმა ჩაიდინა, ესაა ვანდალიზმი, თანამედროვე შაჰ-აბასია. ორი-სამი თვე იბრძოდა კოშკში შესაღწევად, სულ აქ წრიალებდა. ადრე მოვიდა, პოლიცია გამოიძახა და ეუბნებოდა, გატეხეთ კარები, უნდა შევიდეო, მათ უთხრეს, არ გვაქვს ამის უფლებაო. უბნელებს ცოტნე ისე უყვართ, თვალში რომ ჩაუვარდეთ, ხელს არ ამოისვამენ, ამიტომ მანანა მაინც ერიდებოდა უბანს, ეშინოდა წყრომის. ივლისის ბოლოს ვიღაცეები მოიყვანა, საკეტი გაატეხინა და ასე შეაღწია კოშკში, თან ვიღაც მუშები მიიყვანა. ჯერ იტრიალა იქ, მერე უცებ ეზოდან ცეცხლი ამოვარდა. კოლხური კოშკი ერთხელ უკვე დაიწვა და ყველას შეგვეშინდა, სახანძრო გამოიძახეს, აქვეა, გალის ქუჩაზე და 5 წუთში მოვიდა. მათ ნახეს, რომ მანანა რაღაცეებს წვავდა. კოლხური კოშკის ეზო სევასტოპოლის ქუჩიდან ხელისგულივით ჩანს და მეზობლებმა აგვისტოს დასაწყისში დაინახეს, რომ ცოტნეს დარგული ვაზი აღარ არსებობდა.“