რუსეთის პრეზიდენტთან სატელეფონო საუბრის შემდეგ, საფრანგეთის პრეზიდენტი ემანუელ მაკრონი მიიჩნევს, რომ უკრაინაში ყველაზე უარესი ჯერ კიდევ წინ არის. ინფორმაციას ამის შესახებ ფრანგული ტელეარხი BFM TV საფრანგეთის პრეზიდენტის ადმინისტრაციაში წყაროზე დაყრდნობით ავრცელებს.
სატელეფონო საუბრის დროს, რომელიც 1.5 საათი გაგრძელდა, რუსეთის პრეზიდენტმა თავის ფრანგ კოლეგას განუცხადა, რომ სიტუაცია უფრო გამწვავდება, თუ უკრაინელები მის პირობებს არ მიიღებენ.
„პრეზიდენტ მაკრონს ინტუიცია კარნახობს, რომ ყველაზე უარესი ჯერ კიდევ წინ არის იმის გათვალისწინებით, თუ რა განუცხადა მას პრეზიდენტმა პუტინმა. რუსეთის მიზანი მთლიანად უკრაინის აღებაა. ვლადიმერ პუტინის ომის მიზნები არ შეცვლილა“, – აღნიშნა წყარომ.
მანამდე კრემლის პრესსამსახურმა ინფორმაცია გაავრცელა, რომ ვლადიმერ პუტინმა ემანუელ მაკრონს სატელეფონო საუბარში განუცხადა, რომ რუსეთი უკრაინაში სამხედრო ინტერვენციის მიზნებს მიაღწევს, რაც არ უნდა მოხდეს.
