ექსპრეზიდენტ მიხეილ სააკაშვილის შეწყალება იურიდიულად შეუძლებელია – ამბობს პარტია „მოქალაქეების“ ლიდერი, ალეკო ელისაშვილი და ამგვარად ეხმაურება „ნაციონალური მოძრაობის“ ინიციატივას, სააკაშვილის გათავისუფლების მოთხოვნით ხელმოწერები შეაგროვონ და 1-ელ მარტს პრეზიდენტ სალომე ზურაბიშვილს გადასცენ.
„არ ვიცი, ვინ აჯერებს სააკაშვილს, რომ მისი შეწყალება შეუძლია სალომე ზურაბიშვილს. ვინც ამაში არწმუნებს, ის არის მისი მტერი იმიტომ, რომ სალომე ზურაბიშვილი ვერ შეიწყალებს სააკაშვილს. შეწყალება მარტო დამდგარ განაჩენზე ხდება. სააკაშვილს აქვს ერთი დამდგარი განაჩენი და ორი მიმდინარე ბრალი, რომლებზეც განაჩენი არ დამდგარა. შესაბამისად, თუ სალომე ზურაბიშვილი შეიწყალებს სააკაშვილს, გამოვა თუ არა ოთახიდან, იქვე მოკიდებენ ხელს და შეაბრუნებენ ახალი განაჩენის დადგომამდე“, – განაცხადა ალეკო ელისაშვილმა.
ცნობისთვის, „ნაციონალური მოძრაობა“ მიხეილ სააკაშვილის გათავისუფლების მოთხოვნით ხელმოწერების შეგროვებას იწყებს.
