შსს-ს ცნობით, მკვლელობაში ბრალდებულმა დაკავების დროს თავი მოიკლა

199 წაკითხვა

შინაგან საქმეთა სამინისტროს ცნობით, მკვლელობაში ბრალდებულმა პირმა დაკავების დროს თავი მოიკლა.

შინაგან საქმეთა სამინისტროს თბილისის პოლიციის დეპარტამენტის საგამოძიებო მთავარ სამმართველოში 2022 წლის 18 დეკემბერს დაიწყო გამოძიება თბილისში ამავე დღეს მომხდარ განზრახ მკვლელობის და დაჭრის ფაქტზე (საქართველოს სისხლის სამართლის კოდექსის 19-109-ე მუხლით და 236-ე მუხლის მე-3 და მე-4 ნაწილებით).

გამოძიებით დადგინდა, რომ 1987 წელს დაბადებულმა გ.ს.-მ თანმხლები პირის – 1989 წელს დაბადებულ გ.გ.-ს თანდასწრებით, ურთიერთშელაპარაკების ნიადაგზე, ცეცხლსასროლი იარაღიდან გასროლით თავის არეში ჭრილობა მიაყენა 1983 წელს დაბადებულ ლ.ა.-ს, რომელიც ადგილზე გარდაიცვალა, ხოლო მუცლის არეში დაჭრა 1966 წელს დაბადებული ზ.გ., რომელიც საავადმყოფოში გადაიყვანეს.

დანაშაულის ჩადენისთანავე, ორივე პირი შემთხვევის ადგილიდან ავტომობილით მიიმალა.

დანაშაულის ჩამდენი პირების ადგილსამყოფელის დადგენის მიზნით ღონისძიებებში ჩაერთნენ კახეთის პოლიციის დეპარტამენტის თანამშრომლები, რომლებიც, მათი ადგილსამყოფელის ირგვლივ ინფორმაციის მოპოვების მიზნით სხვადასხვა მისამართებთან ერთად გამოცხადდნენ ლაგოდეხის მუნიციპალიტეტში გ.ს.-ის ნათესავის სახლში, სადაც მათ ადგილზე დახვდათ გ.ს.

პოლიციელების დანახვისთანავე, გ.ს.-მ ცეცხლსასროლი იარაღი ამოიღო, ჯერ მიუშვირა პოლიციის თანამშრომლებს, ხოლო შემდეგ თავზე მიიდო და განახორციელა გასროლა, რის შედეგადაც ადგილზე გარდაიცვალა. აღნიშნულ ფაქტს შეესწრნენ ამავე სახლში მყოფი გ.გ. და პოლიციის თანამშრომლები.

სამართალდამცველებმა 18 დეკემბერს თბილისში მომხდარ განზრახ მკვლელობის და დაჭრის ფაქტის დაფარვის ბრალდებით, სსკ-ის 375-ე მუხლით, 1989 წელს დაბადებული გ.გ. ლაგოდეხის მუნიციპალიტეტში დააკავეს. ლაგოდეხის მუნიციპალიტეტში მომხდარ გ.ს. თვითმკვლელობის ფაქტთან დაკავშირებით გამოძიებას აწარმოებს სპეციალური საგამოძიებო სამსახური.

შინაგან საქმეთა სამინისტრო მზადყოფნას გამოთქვამს, აქტიური მონაწილეობა მიიღოს გამოძიების პროცესში.” – ნათქვამია შსს-ს განცხადებაში.

Next Post

ამ კადრების გამოქვეყნების შემდეგ ჩემი თავის უფრო შემეშინდა, რომ არ გავბოროტდე - ანი წითლიძე

ორშ დეკ 19 , 2022
199 წაკითხვაშიმშილობის მე -5 დღე სრულდება. ეს ახალი გამოცდილება არის ჩემთვის. ფსიქოლოგიურად მზად შევხვდი ამიტომ ჩემი ფიზიოლოგიაც ჩემს ცნობიერს დაექვემდებარა.”– წერს “ნაციონალური მოძრაობის” წევრი ანა წითლიძე სოციალურ ქსელში. “ჩემი შიმშილობა არ არის არც მსხვერპლშეწირვა და არც მოლოდინი იმის, რომ ჩემი და ჩემი მეგობრების მოთხოვნა უპირობოდ შესრულდება რუსული ოცნების მიერ. ჩემი შიმშილობა უკიდურესი პროტესტის გამოხატვა არის – ქვეყანაში გამეფებულ ზიზღზე, ბოღმაზე, […]

შესაძლოა მოგეწონოთ