ამერიკის პრეზიდენტის განცხადებით, უკრაინაში დაწყებული საომარი მოქმედებების შემდეგ, არ შეიძლება, რომ ვლადიმერ პუტინი დარჩეს ხელისუფლებაში. ამ საკითხზე ჯო ბაიდენმა 26 მარტს, ვარშავაში ყოფნისას განაცხადა.
„დიქტატორი, რომელიც ცდილობს, აღადგინოს იმპერია, ვერასდროს წაშლის ხალხის სიყვარულს თავისუფლებისადმი, სისასტიკე არასდროს შეამცირებს მათ ნებას, იყვნენ თავისუფალნი. რუსეთი ვერასდროს მიაღწევს გამარჯვებას უკრაინაში. თავისუფალმა ხალხმა უარი თქვა სიბნელესა და უიმედობაში ცხოვრებაზე. ჩვენ სხვანაირი მომავალი გვექნება, უფრო ნათელი მომავალი. დემოკრატიული პრინციპებით, იმედით აღსავსე, წესიერებით და ღირსებით განათებული, თავისუფალი და შესაძლებლობებით აღსავსე. ღვთის გულისთვის, არ შეიძლება, რომ ამ კაცმა შეინარჩუნოს ძალაუფლება“, – განაცხადა ჯო ბაიდენმა.
მოგვიანებით თეთრის სახლის წარმომადგენელმა განმარტება გააკეთა ბაიდენის ამ სიტყვებზე და თქვა, რომ ეს არ იყო რუსეთში რეჟიმის შეცვლის მოწოდება.
„პრეზიდენტის აზრი ის იყო, რომ პუტინს არ შეიძლება მიეცეს უფლება განახორციელოს ძალაუფლება მეზობლებზე ან რეგიონზე. ის [ბაიდენი] არ განიხილავდა პუტინის ძალაუფლებას რუსეთში ან რეჟიმის შეცვლაზე“, – განაცხადა თეთრი სახლის წარმომადგენელმა.
ბაიდენის ამ კომენტარს უკვე გამოეხმაურა კრემლის პრეს-მდივანი დიმიტრი პესკოვი, რომელმაც თქვა:
“ეს არ არის ბაიდენის გადასაწყვეტი, რუსეთის პრეზიდენტს რუსები ირჩევენ”– თქვა პესკოვმა.